الاستاذ عادي

انا بقالي يومين مخنوق علي الاخر
ومش عاوز اكلم حد ولا اشتكي لحد علشان كل واحد اكلمه يقلي خليك عادي الدنيا كلها متستهلش وانت مكبر المواضيع زهقت وارفت من رد فعل الناس اكتر ما انا متضايق

كل الناس بتقلي خليك انسان عادي وهما مش عرفين اني طول عمري اللي فات وانا بحارب الاستاذ عادي
بس شكل الاستاذ عادي هينتصر المرة دي ويخليني ابقه عادي

يعني عادي ....ء
اخبار اهرام عادي
موت حياة عادي
حماس قتح عادي
كل حاجة عادي

انا صحيح اتولدت ولادة عادية
ودخلت مدارس عادية
واتربيت تربية عادية
بس بحاول اعيش بطريقة غير عادية
مش معقول اعيش عيشة الاستاذ عادي
اشتغل شغلانة عادية
اتجوز جوازة عادية
واخلف ولد اسمه (عادي) وبنت اسمها (عادية)ء
واربيهم تربية عادية
وفي الاخر اموت موتة عادية

بصراحة الحياة تبقي زي كوباية ميه بارده في ليلة شتاء باردة بتشربها وانت مش عطشان

علي فكرة يمكن دي مش اول مرة امر بهذة الحالة ( تعب نفسي وبدني و ضيق من البيت والشغل والاجدد اني حتي ملاذي الاخير وصحبتي اصبحت من اسباب ضيقي )ء
بس الجديد اني كنت دائما لما امر بهذة المرحلة واحس اني خلاص وصلت لقاع البحر وبتخنق (بضرب برجلي بقوة علشان اطلع لفوق ) بس للاسف المرة دي كل ماضرب برجلي علشان اطلع من اللي انا فيه بغرس في الارض اكتر لحد ما تعبت وشكلي كدة هستسلم خلاص

ومحدش يقلي عادي
لاني مش ممكن هكون الاستاذ عادي
نفسي في واحد ياخذ بايدي من القاع ويقلي كدة مش عادي
نفسي في واحد يقلي كلام مش عادي
نفسي في واحد ياخد رد فعل مش عادي
نفسي في واحد يكون مش الاستاذ عادي

في النهاية يا أنا يا عادي